ЧАРОЎНАЯ ЯГАДА КЛУБНІКА
Брэстчына – рэгіён з багатай культурнай спадчынай, дзе кожны куточак славіцца сваімі непаўторнымі традыцыямі і звычаямі. Так, установы культуры Лунінеччыны не толькі забяспечваюць захаванне і развіццё культурных традыцый, але і займаюцца пошукам новых брэндаў свайго краю, тым самым садзейнічаюць папулярызацыі культурных дасягненняў, развіццю аграэкатурызму. Сведчаннем таму з’яўляецца раённае свята “Лунінецкія клубніцы”, якое адбылося 25 чэрвеня 2016 г. у в. Дварэц Лунінецкага раёна Брэсцкай вобласці.
Мерапрыемства атрымалася цікавым і маштабным. Дзейнічала шмат пляцовак: горад майстроў, клубнічныя падвор’і “Калі ласка, запрашаем!”, літаратурная паляна “Самая смачная ягада” (выстава літаратуры), паэтычны дворык “Размаўляем аб клубніцах”; вясёлая паляна “Клубнічны калейдаскоп” (гульні, забавы, аква-грым, атракцыёны, горкі, батуты); спартыўная паляна (сілавы экстрым, дартс і інш.).
Свята пачалося з урачыстага шэсця “Клубнічны парад”, якое ўзначальвала галоўная “гераіня” – яе вялікасць Каралева Клубніка ў суправаджэнні сваіх жыхароў і гасцей - дэлегацый з суседніх раёнаў (Столінскага, Ганцавіцкага, Пружанскага).
У канцэртнай праграме “Наш клубнічны край” гучалі песні ў выкананні аматарскіх калектываў (народны клуб аматараў песні “Ярок” Столінскага раёна, вакальная група “Шчырым сэрцам” Пружанскага раёна, народнае аматарскае аб’яднанне “Талака” Ганцавіцкага раёна і інш.).
Увечары гасцей свята чакала дыскатэчная праграма “Клубнічны MIX”.
